नंदुरबार जिल्ह्याच्या सर्वांगीण विकासासाठी आरोग्य, शिक्षण व पाणीपुरवठा या मूलभूत क्षेत्रांना प्राधान्य देऊन कार्य करावे, अशा सूचना राज्याचे वैद्यकीय शिक्षण मंत्री तथा जिल्ह्याचे पालकमंत्री मा.ना.श्री.हसन मुश्रीफ यांनी दिल्या.
जिल्हाधिकारी कार्यालय, नंदुरबार येथे आयोजित विविध विभागांच्या आढावा बैठकीत ते बोलत होते. बैठकीस मा.आमदार सर्व श्री.चंद्रकांत रघुवंशी, श्री.शिरीष नाईक, श्री.राजेश पाडवी, श्री.आमश्या पाडवी, जिल्हाधिकारी डॉ.मित्ताली सेठी, जिल्हा पोलीस अधीक्षक श्रवण दत्त, सहाय्यक जिल्हाधिकारी अनय नावंदर, अतिरिक्त जिल्हाधिकारी धनंजय गोगटे, अतिरिक्त मुख्य कार्यकारी अधिकारी चंद्रकांत पवार, निवासी उपजिल्हाधिकारी आशा संगवी तसेच विविध विभागांचे प्रमुख अधिकारी उपस्थित होते.
पालकमंत्र्यांनी आरोग्य सेवांमध्ये गुणवत्तापूर्ण उपचार सुविधा उपलब्ध करून देणे, ग्रामीण भागात वैद्यकीय मनुष्यबळाची उपलब्धता वाढविणे व प्राथमिक आरोग्य केंद्रांचे सक्षमीकरण करण्याच्या सूचना दिल्या. नागरिकांना वेळेत व दर्जेदार आरोग्य सेवा मिळणे हे प्रशासनाचे प्रमुख उद्दिष्ट असल्याचे त्यांनी नमूद केले.
शिक्षण क्षेत्रात शाळांमधील पायाभूत सुविधा सुधारणा, डिजिटल शिक्षण साधनांचा वापर व शिक्षकांची नियमित उपस्थिती सुनिश्चित करण्याबाबत निर्देश देण्यात आले. तसेच शाळाबाह्य मुलांना शिक्षणाच्या मुख्य प्रवाहात आणण्यासाठी समन्वयाने काम करण्यावर भर देण्यात आला.
पाणीपुरवठा संदर्भात पाणीटंचाई निवारणासाठी जलसंधारण उपाययोजना, पिण्याच्या पाण्याच्या योजना व टँकर व्यवस्थापन प्रभावीपणे राबविण्याच्या सूचना देण्यात आल्या. ग्रामीण भागातील प्रत्येक नागरिकाला सुरक्षित पाणी उपलब्ध करून देणे ही प्रशासनाची जबाबदारी असल्याचे त्यांनी स्पष्ट केले.
बैठकीत विविध विभागांच्या कामकाजाचा सविस्तर आढावा घेण्यात आला. प्रलंबित कामे निश्चित कालमर्यादेत पूर्ण करण्याच्या सूचना देण्यात आल्या. तसेच शासनाच्या विविध योजनांचा लाभ अंतिम घटकापर्यंत पोहोचविण्यासाठी सर्व विभागांनी समन्वयाने कार्य करावे, असे निर्देश देण्यात आले.
#Nandurbar#DistrictAdministration#Health#Education#Water#Development#GoodGovernance#Maharashtra
