कृषी विभाग नंदुरबार, Paani Foundation आणि UMED Maharashtra यांच्या संयुक्त विद्यमाने आयोजित फार्मर कप 2026 अंतर्गत शहादा तालुक्याची दुसरी प्रशिक्षण बॅच उत्साहपूर्ण वातावरणात यशस्वीरित्या पार पडली. तीन दिवसीय या प्रशिक्षणामध्ये शेतकऱ्यांना उत्पादन खर्च कमी करून उत्पन्न वाढविण्याचे प्रभावी मार्ग, गट शेतीच्या माध्यमातून प्रगती साधण्याच्या संधी तसेच विविध स्टँडर्ड ऑपरेटिंग प्रॅक्टिसेस (SOP) चा अवलंब करून समृद्धीकडे वाटचाल कशी करावी याबाबत सखोल मार्गदर्शन करण्यात आले.
पद्मश्री चैत्राम पवार यांचे प्रेरणादायी मार्गदर्शन:
समारोप सत्रात पद्मश्री Chaitram Pawar यांच्या हस्ते सहभागी प्रशिक्षणार्थींना प्रमाणपत्रांचे वितरण करण्यात आले. यावेळी त्यांनी गटशेतीच्या माध्यमातून गाव, राज्य आणि देशाच्या विकासात कसा हातभार लावता येतो, उपलब्ध साधनसामग्रीचा प्रभावी वापर करून मूल्यवर्धन कसे करता येते, तसेच जल, जंगल, जमीन, पशुसंवर्धन व ग्रामविकास या पंचसूत्रीवर आधारित कार्यपद्धती राबविताना येणाऱ्या अडचणींवर मात कशी करावी याविषयी मार्गदर्शन केले.
वनधन केंद्र व मूल्यवर्धनावर भर:
प्रशिक्षणादरम्यान वनधन केंद्राच्या माध्यमातून मोहापासून तयार होणाऱ्या विविध उत्पादनांचे बाजारमूल्य, प्रक्रिया पद्धती आणि त्यातून अधिक आर्थिक लाभ कसा मिळवता येईल यावर सविस्तर माहिती देण्यात आली.
मोहाचे कच्चे तेल, मोहापासून तयार केलेला अंघोळीचा साबण, व्हॅसलीन तसेच मोहाचे मनुके आदी उत्पादनांचे नमुने प्रशिक्षणार्थींना प्रत्यक्ष पाहण्याची संधी मिळाली. यामुळे स्थानिक संसाधनांवर आधारित उद्योग संधींबाबत शेतकऱ्यांमध्ये नवचैतन्य निर्माण झाले.
विभागीय समन्वयातून यशस्वी अंमलबजावणी:
तालुका कृषी अधिकारी काशीराम वसावे, उमेद अभियानाचे बीएमएम ईश्वर जगदाळे आणि त्यांच्या टीमच्या मार्गदर्शनामुळे शहादा तालुक्यातील दोन्ही प्रशिक्षण बॅचेस यशस्वीरित्या पूर्ण झाल्या. दोन बॅचेसमध्ये सुमारे 60 गावांतील 89 शेतकऱ्यांनी प्रशिक्षण घेतले.
दुसऱ्या बॅचच्या आयोजनासाठी मंडळ कृषी अधिकारी राजेंद्र बाविस्कर तसेच उमेद अभियानाच्या प्रभाग समन्वयक विद्या वसावे यांनी पूर्ण वेळ उपस्थित राहून प्रशिक्षणार्थींचा उत्साह वाढविला.
फार्मर कप 2026 अंतर्गत राबविण्यात आलेले हे प्रशिक्षण शेतकऱ्यांना स्वावलंबन, गटशक्ती आणि मूल्यवर्धनाच्या माध्यमातून आर्थिक सक्षमीकरणाच्या दिशेने सक्षम पाऊल ठरत आहे.
