(शहादा) लोकनायक जयप्रकाश नारायण सहकारी शेतकरी सुतगिरणी कमलनगर उंटावद होळ ता.शहादा जि.नंदुरबार येथील कार्यकारी संचालक श्री. राजाराम दुल्लभ पाटील,उपकार्यकारी संचालक श्री.उत्तम संभू पाटील व सहका-यांनी केलेल्या भ्रष्टाचाराची,आर्थिक गैरव्यवहाराची सखोल चौकशी करून दोषींवर कायदेशीर कडक कारवाई करा,त्यांना पदावरून हटवा व कामगारांच्या बेमुदत संपाच्या मागण्या पूर्ण करा,अशी मागणी बिरसा फायटर्स जिल्हा शाखा नंदूरबार संघटनेकडून उपविभागीय अधिकारी तथा उपविभागीय दंडाधिकारी शहादा यांच्याकडे दिनांक २८ ऑगस्ट २०२३ रोजी एका निवेदनाद्वारे करण्यात आली होती.त्या निवेदनाची दखल उपविभागीय दंडाधिकारी शहादा सुभाष दळवी यांनी घेतली आहे.
बिरसा फायटर्सच्या निवेदनाची उपविभागीय दंडाधिकारी यांनी घेतली दखल
उपविभागीय दंडाधिकारी यांच्या पत्रात नमूद करण्यात आले आहे की,श्री.सुशिलकुमार पावरा,संस्थापक राष्ट्रीय अध्यक्ष,इंटरनॅशनल आयडॉल व राष्ट्रीय कलामित्र बिरसा फायटर्स व इतर पदाधिकारी यांनी दिनांक २८ ऑगस्ट २०२३ रोजीच्या निवेदनाद्वारे लोकनायक जयप्रकाश नारायण सहकारी शेतकरी सुतगिरणी कमलनगर उंटावद होळ तालुका शहादा जिल्हा नंदूरबार येथील कार्यकारी संचालक श्री.राजाराम दुल्लभ पाटील, उपकार्यकारी संचालक उत्तम दुल्लभ पाटील व सहका-यांनी केलेल्या भ्रष्टाचाराची,आर्थिक गैरव्यवहाराची चौकशी करून दोषींवर कायदेशीर कडक कारवाई करून पदावरून हटविणे व कामगारांच्या बेमुदत संपाच्या १ ते २५ मागण्या पूर्ण करणेबाबत इकडे निवेदन सादर केले आहे.सोबतच्या निवेदनाची छायांकित प्रत जोडण्यात आली असून निवेदनात नमूद केलेल्या बाबींची सविस्तर चौकशी करून, नियमानुसार योग्य ती उचित कार्यवाही करावी व केलेल्या कार्यवाहीचा अहवाल इकडे सादर करावा,असा आदेश उपविभागीय दंडाधिकारी शहादा सुभाष दळवी यांनी व्यवस्थापक संचालक सुतगिरणी कमलनगर उंटावद होळ तालुका शहादा जिल्हा नंदूरबार यांना दिले आहेत. (Nandurbar News)
दोषींवर कायद्यानुसार कारवाई करावी : सुशिलकुमार पावरा
बिरसा फायटर्स जिल्हा शाखा नंदूरबार संघटनेच्या निवेदनाची दखल उपविभागीय दंडाधिकारी शहादा सुभाष दळवी यांनी घेतली आहे. त्यामुळे भ्रष्टाचारांचे धाबे दणाणले असून आपल्यावर होणा-या कारवाईला घाबरून एमडीने कामगारांच्या ६ मागण्या मान्य केल्याचे बोलले जात आहे.एमडी राजाराम पाटील, उपकार्यकारी संचालक उत्तम पाटील व सहका-यांनी सुतगिरणीतील कामगारांचे व शेतक-यांचे लाखों रुपये लुबाळले असून ते त्यांना परत मिळावेत,व दोषींवर कायद्यानुसार कारवाई करावी,तरच भ्रष्टाचाराला आळा बसेल, अशी प्रतिक्रिया बिरसा फायटर्सचे राष्ट्रीय अध्यक्ष सुशिलकुमार पावरा यांनी दिली आहे.सुतगिरणीतील भ्रष्टाचा-यांवर कोणती कारवाई होईल, याकडे कामगारांचे व शेतक-यांचे लक्ष लागून आहे. (Nandurbar News)
उंटावद होळ सुतगिरणी कामगारांचा दहा दिवसाचा संपानंतर सुतगिरणी चालू
आपल्या विविध मागण्यांसाठी दिनांक २२ ऑगस्ट २०२३ पासून सुतगिरणीतील कामगारांनी सुरू केलेला बेमुदत संप अखेर दहाव्या दिवशीही मागे घेण्यात आला आहे.पीएफ मिळावा,मागील व या वर्षीचा बोनस मिळावा,पगार वेळेवर मिळावा,इंडेक्स नंबर लावण्यात यावा,ग्रॅज्युएटी मिळावी,दवाखाना सुरू करावा,कॅन्टीन सुरू करावे,महीलांना रात्रीची १२ ते ८ ची ड्यूटी देऊ नका,पतपेढीत व बॅकेत कर्जाचे हप्ते पोहचवा,वर्षाला २५ रजा द्या,पिण्याच्या पाण्याची सोय करा,रिटायर्ड कामगारांना पेन्शन द्या,सुतगिरणीचे झाडे तोडून विकू नका,सुतगिरणीचे सामान भंगारच्या भावाने विकू नका,शेतक-यांचे कापसाचे पैसे द्या,कामगारांचे पैसे द्या इत्यादी मागण्यांसाठी हा संप सुतगिरणी कमलनगर उंटावद होळ ता.शहादा गेटसमोर सुरू होता.अखेर दहाव्या दिवशी संप मागे घेण्यात आला व सुतगिरणी पूर्ववत चालू करण्यात आली आहे.आपल्या काही मागण्या मान्य झाल्या म्हणून काही कामगार खूश आहेत,तर अजूनही १८ महिन्यांचा पीएफ देण्यात आला नाही.त्यामुळे थोडी खूशी थोडा गम! असे स्थिती कामगारांत निर्माण झाली आहे.(Nandurbar News)
चालु वर्षाचा ५ महिन्यांचा पीएफ भरला, माहे ऑगस्ट पासून इंडेक्स नंबर लावणार, माहे सप्टेंबर पासून एक पगारी रजा लावणार, बदली कामगारांना कायम स्केल लावणार, सन २०२१ ते २०२२ व चालू वर्षाचा बोनस दिनांक ८ ते ९ नोव्हेंबर रोजी देणार, कामगारांना प्रत्येक महिन्याचा पगार ५ ते ६ तारखेला देणार, माहे ऑगस्ट पासून प्रत्येक महिन्याचा पीएफ १५ ते १७ तारखेला भरणार, मागील वर्षीचा बोनस चेक दिनांक ३० ऑगस्ट ला दिला आहे. अशा एकूण ६ मागण्या मान्य करण्यात आल्या आहे.म्हणून आम्ही हा बेमुदत संप मागे घेतला आहे.या संपामध्ये सगळेच कामगार एकजुटीने सहभागी झाले व आपल्या मागण्यांबाबत बोलले.यापुढे सुतगिरणी प्रशासन संपात बोलणा-या कुठल्याही कामगारांवर दबाव टाकेल,कामावरून काढून टाकण्याचा प्रयत्न करेल किंवा कुठल्याही प्रकारचा त्रास देण्याचा प्रयत्न करेल,तर कामगारांच्या पाठीशी आमची युनियन भक्कमपणे उभी राहील,अशी माहिती सुतगिरणी कामगार युनियनचे सदस्य दिलीप सोनवणे यांनी दिली.
