जलयुक्त शिवार अभियान २.० अंतर्गत कामांना गती

नंदुरबार जिल्ह्यात जलसंधारण आणि पाणी साठवण क्षमता वाढविण्यासाठी राबविण्यात येत असलेल्या “जलयुक्त शिवार अभियान २.०” अंतर्गत विविध कामांचा आढावा आज मा. जिल्हाधिकारी डॉ. मित्ताली सेठी यांच्या अध्यक्षतेखाली घेण्यात आला.

बैठकीमध्ये वन विभाग, कृषी विभाग तसेच लघुपाटबंधारे विभाग (जिल्हा परिषद) यांच्या माध्यमातून सुरू असलेल्या विविध जलसंधारण कामांच्या प्रगतीचा सविस्तर आढावा घेण्यात आला. येणाऱ्या पावसाळ्याच्या पार्श्वभूमीवर सर्व प्रगतिपथावरील कामे वेळेत आणि गुणवत्तापूर्ण पद्धतीने पूर्ण करण्याच्या सूचना संबंधित विभागांना देण्यात आल्या.

जलयुक्त शिवार अभियानाच्या आराखड्यात समाविष्ट असलेल्या उर्वरित कामांची अंदाजपत्रके तात्काळ प्रशासकीय मान्यतेसाठी सादर करण्याचे निर्देशही बैठकीत देण्यात आले. जलसंधारणाशी संबंधित प्रत्येक काम नियोजनबद्ध पद्धतीने पूर्ण होण्यासाठी विभागीय समन्वय अधिक मजबूत करण्यावर भर देण्यात आला.

अभियानांतर्गत पूर्ण झालेल्या कामांचे जिओपोर्टल (Geoportal) वर जिओटॅगिंग करण्याबाबत सर्व विभागांना सूचना देण्यात आल्या. यामुळे कामांची पारदर्शकता, अचूक नोंद व प्रत्यक्ष प्रगतीचे डिजिटल निरीक्षण अधिक प्रभावी होणार आहे.

तसेच केंद्र शासनाच्या “जल संचय जन भागीदारी (JSJB)” पोर्टलवर जलसंधारणाची कामे नियमितपणे अपलोड करण्याच्या सूचना देण्यात आल्या. जलसंधारण क्षेत्रात लोकसहभाग आणि तंत्रज्ञानाचा प्रभावी वापर करून शाश्वत जलव्यवस्थापन साध्य करण्यावर बैठकीत भर देण्यात आला.

नंदुरबार जिल्ह्यातील जलस्रोत संवर्धन, भूजल पुनर्भरण आणि शेतकऱ्यांना दीर्घकालीन पाणी उपलब्धता सुनिश्चित करण्यासाठी प्रशासन कटिबद्ध असून, जलयुक्त शिवार अभियान २.० हा त्यादृष्टीने महत्त्वपूर्ण उपक्रम ठरत आहे.

#JalyuktShivar#जलयुक्तशिवार#WaterConservation#Nandurbar#RainwaterHarvesting#GeoTagging#JSJB#SustainableDevelopment#WaterManagement#जलसंधारण#जलसंपन्ननंदुरबार#DistrictAdministration#TribalDevelopment#ClimateAction#GroundwaterRecharge