महाराष्ट्र सरकारतर्फे राज्यातील महिलांच्या आर्थिक स्वातंत्र्यासाठी, आरोग्य आणि पोषणात सुधारणा घडविण्यासाठी तसेच कुटुंबातील त्यांची निर्णायक भूमिका अधिक मजबूत करण्यासाठी ‘मुख्यमंत्री माझी लाडकी बहीण’ ही महत्वाकांक्षी योजना प्रभावीपणे राबविण्यात येत आहे. या योजनेअंतर्गत पात्र महिलांना थेट लाभ हस्तांतरण (Direct Benefit Transfer) प्रणालीद्वारे आर्थिक मदत त्यांच्या बँक खात्यात जमा केली जाते.
आधार प्रमाणीकरण आता अनिवार्य:
आधार (आर्थिक आणि इतर अनुदाने, लाभ आणि सेवांचे लक्ष्यित वितरण) अधिनियम, २०१६ च्या कलम ७ नुसार शासनाने १ ऑगस्ट २०२४ रोजी अधिसूचना प्रसिद्ध केली आहे. त्यानुसार, या योजनेचा लाभ घेण्यासाठी पात्र महिलेला आधार क्रमांक सादर करणे किंवा आधार प्रमाणीकरण (Aadhaar Authentication) करणे बंधनकारक आहे.
e-KYC प्रक्रिया आणि वेळापत्रक:
मंत्रीमंडळाच्या निर्णयानुसार, प्रत्येक वर्षी जून महिन्यात योजनेतील लाभार्थ्यांचे e-KYC करणे आवश्यक आहे. महिला व बाल विकास विभागाला UIDAI ने Sub-AUA/Sub-KUA म्हणून नियुक्त केले आहे, ज्यामुळे विभागाला e-KYC द्वारे लाभार्थींची पडताळणी आणि प्रमाणीकरण करता येईल.
⦁ लाभार्थी महिला https://ladakibahin.maharashtra.gov.in या अधिकृत वेबसाईटवर e-KYC प्रक्रिया पूर्ण करू शकतात.
⦁ या परिपत्रकाच्या दिनांकापासून २ महिन्यांच्या आत e-KYC पूर्ण करणे बंधनकारक आहे.
⦁ निर्धारित कालावधीत e-KYC न केलेल्या लाभार्थ्यांना पुढील लाभासाठी पात्रता राहणार नाही.
पुढील काळातील प्रक्रिया:
दरवर्षी जून महिन्यापासून २ महिन्यांच्या कालावधीत e-KYC प्रक्रिया पूर्ण करणे आवश्यक राहील. यामुळे लाभार्थींच्या माहितीची पडताळणी वेळेवर होईल आणि आर्थिक लाभ अडथळ्याविना त्यांच्या खात्यात जमा होईल.
महिलांच्या सक्षमीकरणासाठी ठोस पाऊल:
‘मुख्यमंत्री माझी लाडकी बहीण’ योजना ही केवळ आर्थिक मदत नसून ती महिलांना स्वावलंबन, आरोग्य आणि कुटुंबातील निर्णयक्षमतेसाठी सक्षम करण्याचा सरकारचा महत्त्वपूर्ण उपक्रम आहे. e-KYC प्रणालीमुळे योजनेच्या अंमलबजावणीत अधिक पारदर्शकता, कार्यक्षमता आणि वेग येणार आहे.
टीप: लाभार्थींनी वेळेत e-KYC प्रक्रिया पूर्ण करून योजनेचा लाभ अखंडितपणे मिळवावा.
#माझीलाडकीबहीण#महिला_सक्षमीकरण#eKYC#dbt#MaharashtraGovernment#womenempowermentmovement#governmentschemes
