नंदुरबार जिल्ह्यातील पर्यटन विकासाला नवी दिशा देणाऱ्या महत्त्वाकांक्षी ‘डार्क स्काय स्टेशन’ प्रकल्पाबाबत आज तोरणमाळ येथे महत्त्वपूर्ण बैठक पार पडली. या बैठकीस मा. जिल्हाधिकारी डॉ. मित्ताली सेठी यांच्या अध्यक्षतेखाली तसेच मा. मुख्य कार्यकारी अधिकारी, जिल्हा परिषद यांच्या सहअध्यक्षतेखाली संबंधित विभागांचे अधिकारी उपस्थित होते.
या बैठकीत तोरणमाळ परिसरातील नैसर्गिक भौगोलिक स्थिती, प्रकाशप्रदूषणाचे प्रमाण, तसेच खगोल निरीक्षणासाठी आवश्यक असलेल्या सुविधा यांचा सखोल आढावा घेण्यात आला. विशेषतः ‘डार्क स्काय स्टेशन’ उभारणीसाठी आवश्यक तांत्रिक बाबी, पर्यावरणीय घटक आणि पर्यटन विकासाच्या संधींचा विचार करण्यात आला.
‘डार्क स्काय स्टेशन’ हा प्रकल्प साकार झाल्यास खगोलशास्त्र अभ्यासक, संशोधक आणि पर्यटकांसाठी तोरणमाळ हे आकर्षणाचे प्रमुख केंद्र ठरणार आहे. नैसर्गिक आकाश निरीक्षणासाठी उपयुक्त असलेल्या या ठिकाणी प्रकाशप्रदूषण कमी असल्याने तारांगणाचे स्पष्ट दर्शन घेण्याची अनोखी संधी उपलब्ध होणार आहे.
बैठकीदरम्यान विविध विभागांच्या अधिकाऱ्यांनी आपल्या सूचना मांडत प्रकल्पाच्या प्रभावी अंमलबजावणीसाठी आवश्यक उपाययोजनांवर सविस्तर चर्चा केली. तसेच पुढील कार्यवाहीसाठी नियोजन निश्चित करण्यात आले.
या उपक्रमामुळे तोरणमाळ हे राज्यातील एक महत्त्वाचे ‘खगोल पर्यटन’ केंद्र म्हणून विकसित होण्याची शक्यता व्यक्त करण्यात आली. यामुळे स्थानिक अर्थव्यवस्थेला चालना मिळण्याबरोबरच पर्यटन क्षेत्रातही नवीन संधी निर्माण होणार आहेत.
पर्यावरणपूरक पर्यटनाला प्रोत्साहन देत विज्ञान व निसर्ग यांचा सुंदर संगम साधणारा हा प्रकल्प नंदुरबार जिल्ह्याच्या विकासासाठी एक महत्त्वाचे पाऊल ठरणार आहे.
#Nandurbar#DarkSkyStation#ToranaMal#AstroTourism#DistrictAdministration#Innovation#TourismDevelopment#ScienceAndNature#Maharashtra#DigitalIndia
