नीती आयोगाच्या मार्गदर्शनाखाली राबविण्यात येणाऱ्या ‘संपूर्णता अभियान 2.0’ चा ब्लॉक-स्तरीय शुभारंभ अक्राणी तालुक्यात उत्साहपूर्ण वातावरणात पार पडला. NITI Aayog यांच्या संकल्पनेतून साकारलेले हे अभियान आरोग्य, पोषण, शिक्षण, स्वच्छता आणि पशुसंवर्धन या महत्त्वपूर्ण क्षेत्रांमध्ये 100 टक्के सेवा संतृप्तता साध्य करण्यासाठी राबविण्यात येत आहे.
कार्यक्रमाची सुरुवात प्रमुख मान्यवरांच्या हस्ते साईन बोर्डचे अनावरण व दीपप्रज्वलन करून करण्यात आली. यावेळी गट विकास अधिकारी संगीता नाईक, विस्तार अधिकारी – पी. एस. पवार, नीती आयोग फेलो – हितेश सूर्यवंशी, महिला व बालविकास प्रकल्प अधिकारी (CDPO), पर्यवेक्षक, अंगणवाडी सेविका, गट शिक्षणाधिकारी, तालुका पशुवैद्यकीय अधिकारी, ग्रामसेवक तसेच सरपंच मोठ्या संख्येने उपस्थित होते.
विभागीय समन्वयावर भर:
कार्यक्रमात मार्गदर्शन करताना गट विकास अधिकाऱ्यांनी सांगितले की, ‘संपूर्णता अभियान 2.0’ अंतर्गत निश्चित करण्यात आलेल्या सर्व निर्देशकांमध्ये अपेक्षित उद्दिष्टे साध्य करण्यासाठी विभागीय समन्वय, क्षेत्रीय कृती आराखडा आणि सातत्यपूर्ण आढावा यावर विशेष भर देण्यात येणार आहे.
सर्व विभागांनी एकत्रितपणे काम केल्यास अक्राणी तालुका संपूर्णतेच्या दिशेने निश्चितच यशस्वी वाटचाल करेल, असा विश्वास व्यक्त करण्यात आला.
संपूर्णतेची सामूहिक प्रतिज्ञा:
यावेळी उपस्थित अधिकारी व कर्मचाऱ्यांनी ‘संपूर्णता अभियान 2.0’ ची सामूहिक प्रतिज्ञा घेतली. अक्राणी तालुक्याला सर्वांगीण विकासाच्या मार्गावर नेण्यासाठी एकजुटीने कार्य करण्याचा निर्धार व्यक्त करण्यात आला.
लाभार्थ्यांपर्यंत योजनांचा प्रभावी पोहोच:
या अभियानामुळे शासनाच्या विविध योजना अधिक प्रभावीपणे आणि शाश्वत स्वरूपात लाभार्थ्यांपर्यंत पोहोचतील, असा विश्वास मान्यवरांनी व्यक्त केला. आरोग्य व पोषण सुधारणा, शिक्षणातील प्रगती, स्वच्छता उपक्रमांची गती आणि पशुसंवर्धन क्षेत्रातील मजबुती यामुळे तालुक्याच्या विकासाला नवे बळ मिळणार आहे.
‘संपूर्णता अभियान 2.0’ हा केवळ एक कार्यक्रम नसून, शंभर टक्के सेवा वितरण आणि शाश्वत विकासासाठीची व्यापक चळवळ आहे, असे यावेळी नमूद करण्यात आले.
