दुष्काळामुळे हवालदिल शेतकऱ्यांना बळ, आत्मविश्वास देण्यासाठी मुख्यमंत्री देवेंद्र फडणवीस यांनी शेतकऱ्यांसोबत दिवाळी साजरी केली.

       नरखेड तालुक्यातील लोहारी सावंगा येथे काल मुख्यमंत्र्यांनी शेतकऱ्यांसोबत दिवाळी साजरी केली. गावातच रामभाऊ बालपांडे या शेतकऱ्यांच्या घरी काल त्यांनी सायंकाळचे भोजन घेतले. शेतकऱ्यांशी संवाद साधल्यानंतर कुटुंबियांशी गप्पा करत मुक्काम केला. सकाळी उठल्यानंतर नास्त्यात घरच्या महिलांनी बनविलेला तर्री पोहा घेतला. पोहा मला आवडतो. आठवड्यातून किमान चार दिवस नास्त्यात पोहा असतो, असे कुटुंबियांशी गप्पा करतांना मुख्यमंत्री देवेंद्र फडणवीस यांनी सांगितले.

          लोहारी सावंगा गाव सोडतांना मुख्यमंत्र्यांनी पत्रकारांशी संवाद साधला. शेतकरी कुटुंबात मुक्काम केल्यानंतर आपल्या भावना काय आहेत? असा प्रश्न विचारल्यानंतर बालपांडे कुटुंबाशी जवळीक झाली. त्यांनी छान आदरातिथ्य केले. शेतकरी रामभाऊ बालपांडे यांना देखील दुष्काळाचा फटका बसला. त्यांनी हार मानली नाही. कुटुंबातील तीन खातेदारांना कर्जमाफीचा लाभ मिळाला, याचे समाधान वाटले. बालपांडे कुटुंब वारीला जातात. विठ्ठलाची अर्चना करणारा परिवार कधीही हतबल होत नाही. विपरीत परिस्थितीचा सामना करण्याचे बळ त्यांच्यात असते, असे मुख्यमंत्री म्हणाले.

सकाळी नास्ता घेत असतांना ७५ वर्षांच्या कमलाबाई मानेराव मुख्यमंत्र्यांना भेटल्या. वयमानाने कामधंदा होत नाही. त्यामुळे बकरी पालनाचा प्रस्ताव व अपंग मुलाला आर्थिक मदतीचे प्रकरण करून देण्याची विनंती त्यांनी केली. त्यावर तातडीने कारवाई करण्यासोबतच कमलाबाईचे निराधार अनुदानाचे प्रकरण करता येईल का? याची पडताळणी करण्याचे निर्देश मुख्यमंत्र्यांनी दिले.