दुष्काळग्रस्त शेतकऱ्यांना मदत करण्यासाठी शासन कटिबद्ध – मंत्री दत्तात्रय भरणे

यावेळी त्यांनी शेतकऱ्यांशी संवाद साधून पावसाचे प्रमाण, पिकांची वाढ तसेच पाण्याच्या उपलब्धतेबाबत माहिती जाणून घेऊन दुष्काळग्रस्त शेतकऱ्यांना मदत करण्यासाठी शासन कटिबद्ध असल्याचे कृषिमंत्री दत्तात्रय भरणे यांनी सांगितले.

यावेळी आमदार बाबासाहेब देशमुख, प्रांताधिकारी अमित माळी, तहसीलदार बाळूताई भागवत,  प्र.उपविभागीय कृषी अधिकारी दिपाली जाधव  उपस्थित होते.

यावेळी मंत्री दत्तात्रय भरणे म्हणाले,दुष्काळग्रस्त शेतकऱ्यांना प्रत्यक्ष मदत मिळण्यासाठी पंचनामे महत्त्वाचे आहेत. त्यामुळे प्रशासनाने शेतकऱ्यांना विश्वासात घेऊन

पावसातील खंडामुळे निर्माण झालेल्या परिस्थितीचे वस्तुनिष्ठ मूल्यांकन करून आवश्यक ती कार्यवाही करावी. पावसाच्या खंडामुळे राज्यात एक कोटी 49 लाख हेक्टर वरील पिकांचे नुकसान झाले आहे.  आतापर्यंत सुमारे एक कोटी हेक्टर वरील नुकसानग्रस्त पिकांचे पंचनामे पूर्ण झाले असून, येत्या चार ते पाच दिवसात पंचनाम्याचे काम पूर्ण करण्यात येणार आहे. शासनाकडून पिण्याचे पाणी, जनावरांचा चारा याबाबत नियोजन  करून टंचाईवर आवश्यक उपाययोजना करण्यात येईल.

नुकसानग्रस्त शेतकऱ्यांना केंद्र व राज्य शासनाच्या  विविध योजनेतून मदत केली जाईल असे त्यांनी यावेळी सांगितले.

तसेच सोलापूर जिल्ह्यात  सर्वात जास्त दुष्काळग्रस्त पिकांच्या पंचनाम्याचे सर्वाधिक काम सांगोला तालुक्यात झाले असून सुमारे 95  टक्के नुकसानग्रस्त पिकांचे पंचनामे पूर्ण झाले आहेत.  राज्यात केंद्रीय पथकाकडून पाहणी करण्यात येत असून दुष्काळग्रस्त शेतकऱ्यांना केंद्र व राज्य शासनाकडून सर्वतोपरी मदत करण्यात येईल असे त्यांनी यावेळी सांगितले.यावेळी शेतकऱ्यांनी पिकांची सद्यस्थिती, पाण्याची उपलब्धता आणि संभाव्य नुकसानीबाबत त्यांच्या अडचणी मांडल्या. कृषिमंत्री भरणे यांनी शेतकऱ्यांचे म्हणणे जाणून घेत संबंधित अधिकाऱ्यांकडूनही परिस्थितीची माहिती घेतली. यावेळी स्थानिक शेतकरी व ग्रामस्थ उपस्थित होते.

यावेळी आमदार बाबासाहेब देशमुख  यांनी सांगोला तालुक्यातील उपलब्ध पाण्याची स्थिती व शेतीच्या नुकसानीची वस्तुस्थिती  कृषीमंत्री  यांच्या निदर्शनास आणून दिली. खरीप पिकांसह इतर पिकांनाही दुष्काळाचा मोठा फटका बसला असून, पंचनामे आणि मदतीची प्रक्रिया तातडीने पूर्ण करण्याची मागणी त्यांनी यावेळी केली.