जिल्हा प्रशासन व जिल्हा पोलीस प्रशासन यांच्या संयुक्त विद्यमाने नंदुरबार जिल्ह्यात युवकांचे शिक्षण, कौशल्य विकास, करिअर मार्गदर्शन व व्यक्तिमत्त्व विकासाच्या माध्यमातून सर्वांगीण सक्षमीकरण करण्यासाठी **’मिशन सक्षम’** हा उपक्रम प्रभावीपणे राबविण्यात येत आहे. या उपक्रमाला अधिक बळकटी देण्यासाठी जिल्हाधिकारी **डॉ.मित्ताली सेठी** यांनी दिनांक **२३ व २४ जुलै २०२६** रोजी छत्रपती संभाजीनगर येथे प्रथम एज्युकेशन फाउंडेशनच्या विविध शैक्षणिक व कौशल्य विकास उपक्रमांना भेट देऊन सविस्तर आढावा घेतला.
या भेटीदरम्यान **मिशन सक्षम ३.०** अंतर्गत पहिल्या तुकडीतील विद्यार्थ्यांच्या प्रमाणपत्र वितरण समारंभात सहभागी होत विद्यार्थ्यांना शिक्षणाचे महत्त्व, कौशल्य विकास, रोजगाराच्या संधी आणि जिल्ह्याच्या विकासात युवकांच्या भूमिकेबाबत प्रेरणादायी मार्गदर्शन करण्यात आले. विद्यार्थ्यांनी आत्मविश्वासाने पुढे जाऊन समाजाच्या विकासात योगदान द्यावे, असे आवाहन करण्यात आले.
भेटीदरम्यान मिशन सक्षम, अंगणवाडी केंद्रे, निपुण महाराष्ट्र मातृगट, शाळा, क्रिएटिव्हिटी क्लब, क्रिएटर लॅब, स्किलिंग सेंटर तसेच इतर विविध शैक्षणिक उपक्रमांची पाहणी करण्यात आली. विद्यार्थी, शिक्षक, पालक, समुदायातील सदस्य आणि क्षेत्रीय कार्यसंघांशी संवाद साधून उपक्रमांची परिणामकारकता जाणून घेण्यात आली.
यावेळी शिक्षण व कौशल्य विकास क्षेत्रात शासन आणि स्वयंसेवी संस्थांमधील समन्वय अधिक बळकट करण्याबाबत सकारात्मक चर्चा झाली. नंदुरबार जिल्ह्यात **मिशन सक्षम** उपक्रम अधिक व्यापक स्वरूपात राबविण्यासाठी जिल्हा प्रशासन, पोलीस प्रशासन आणि प्रथम एज्युकेशन फाउंडेशन यांच्या संयुक्त सहभागातून कार्यशाळा आयोजित करून पुढील कृती आराखडा निश्चित करण्याबाबत सहमती दर्शविण्यात आली.
युवक, विद्यार्थी आणि समुदायाच्या सर्वांगीण सक्षमीकरणासाठी शासन, प्रशासन आणि सामाजिक संस्थांच्या समन्वयातून शिक्षण व कौशल्य विकासाचे उपक्रम अधिक प्रभावीपणे राबविण्याचा निर्धार यावेळी व्यक्त करण्यात आला.
#MissionSaksham#नंदुरबार#डॉ_मित्ताली_सेठी#NandurbarDistrict#DistrictAdministration#NandurbarPolice#PrathamEducationFoundation#SkillDevelopment#YouthEmpowerment#Education#GovernmentOfMaharashtra
