सहभागाचा वस्तुपाठ: ग्रामपंचायत बिलाडी येथे श्रमदानातून बंधाऱ्याची गाळमुक्तता!
गावाचा विकास हा केवळ शासकीय अनुदानावरच अवलंबून असतो असे नाही, तर लोकसहभाग आणि ग्रामस्थांच्या एकजुटीची जोड मिळाली तर विकासकामांना कशी गती मिळते, याचे उत्तम उदाहरण नंदुरबार जिल्ह्यातील ग्रामपंचायत बिलाडी येथे नुकतेच पाहायला मिळाले.
‘मुख्यमंत्री समृद्ध पंचायत राज अभियाना’ अंतर्गत गावात एक प्रेरणादायी उपक्रम राबवण्यात आला, ज्यामध्ये ग्रामस्थांनी एकत्र येत श्रमदानातून बंधाऱ्यातील गाळ काढण्याचे महत्त्वपूर्ण काम केले.
जनसहभागातून श्रमदानाची चळवळ.
पाण्याची साठवणूक वाढवणे आणि शेतीसाठी पाण्याची टंचाई दूर करणे या उद्देशाने बंधाऱ्याची स्वच्छता व गाळ काढण्याचे काम हाती घेण्यात आले होते. विशेष म्हणजे, यासाठी कोणतीही मोठी यंत्रसामग्री किंवा ठेकेदार न नेमता, गावकऱ्यांनी स्वतः श्रमदान करण्याचा निर्णय घेतला. सरपंच, उपसरपंच, ग्रामपंचायत अधिकारी, सर्व ग्रामपंचायत सदस्य आणि आबालवृद्ध ग्रामस्थ या मोहिमेत उत्साहाने सहभागी झाले.
अभियानाचा खरा उद्देश साध्य
‘मुख्यमंत्री समृद्ध पंचायत राज अभियान 2.0’ अंतर्गत ग्रामविकासाच्या विविध संकल्पना राबवल्या जात आहेत. बिलाडी ग्रामपंचायतीने घेतलेला हा निर्णय अभियानाच्या मूळ उद्देशाला खऱ्या अर्थाने न्याय देणारा ठरला आहे. या उपक्रमामुळे गावातील एकता, समजूतदारपणा आणि श्रमसंस्कृतीचे दर्शन घडले आहे.
गावाच्या या आदर्श आणि प्रेरणादायी कामगिरीचे सर्वत्र कौतुक होत असून, इतर ग्रामपंचायतींनीही अशाच उपक्रमांतून स्वयंपूर्णतेकडे वाटचाल करावी, अशी अपेक्षा व्यक्त होत आहे.
Follow Us:
संबधित बातम्या
