विशेष गरजा असलेल्या बालकांच्या कुटुंबाधारित संगोपनाला प्रोत्साहन द्या; यंत्रणांनी समन्वयाने काम करावे – आदिती तटकरे

केंद्रीय महिला व बालविकास मंत्रालयांतर्गत कार्यरत केंद्रीय दत्तक संसाधन प्राधिकरणाने (सीएआरए) विशेष गरजा असलेल्या दिव्यांग बालकांच्या दत्तक प्रक्रियेला आणि कुटुंबाधारित संगोपनाला अधिक बळकटी देण्यासाठी पश्चिम विभागीय चौथी प्रादेशिक सल्लामसलत कार्यशाळेचे नुकतेच आयोजन करण्यात आले होते. यावेळी दूरदृश्य संवाद प्रणालीद्वारे मंत्री तटकरे यांनी उपस्थितांशी संवाद साधला.
सीएआरएच्या ‘दत्तक जागरूकता अभियान २०२५’ अंतर्गत महाराष्ट्र शासन आणि राज्य दत्तक संसाधन संस्था (एसएआरए) यांच्या सहाय्याने ही कार्यशाळा आयोजित करण्यात आली होती. ‘विशेष गरजा असलेल्या दिव्यांग बालकांच्या संस्थाबाह्य पुनर्वसनाला प्रोत्साहन’ ही या अभियानाची संकल्पना आहे. विशेष गरजा असलेल्या बालकांना सुरक्षित, प्रेमळ आणि पोषक कौटुंबिक वातावरण उपलब्ध करून देणे तसेच त्यांचे कुटुंबाधारित संगोपन आणि दत्तक प्रक्रियेला प्रोत्साहन देणे, हा या अभियानाचा प्रमुख उद्देश आहे.