गौण खनिजाची चोरी; हायवा चालकासह मालकाविरुद्ध गुन्हा दाखल

नंदुरबार शहरातील पातोंडा गावाच्या शिवारात दोन जण गौण खनिज मातीची चोरी करून वाहतूक करीत असल्याची माहिती महसूल विभागाला मिळाली होती. त्यानुसार मंडळ अधिकारी बळीराम दत्तात्रय नोटे यांनी हायवा वाहन क्रमांक क्र. एम.एच. ४५-बी.एफ. ७६७०५ पकडले.

चौकशीदरम्यान संबंधित वाहनातून गौण खनिजाची वाहतूक केली जात असल्याचे आढळून आले. वाहन चालक हा वाहनातून गौण खनिजाची वाहतूक करताना आढळला. या प्रकारामुळे शासनाचा महसूल बुडविण्याचा प्रयत्न झाल्याचे निदर्शनास आले.

या प्रकरणी मंडळ अधिकारी बळीराम नोटे यांनी नंदुरबार उपनगर पोलिस ठाण्यात फिर्याद दाखल केली. त्यांच्या फिर्यादीवरून हायवा वाहन चालक आणि मालक दादाभाई माणिक कोळी यांच्याविरुद्ध भारतीय न्याय संहितेतील संबंधित कलमांसह महाराष्ट्र जमीन महसूल अधिनियम १९६६ मधील कलम ४८(७) अन्वये गुन्हा दाखल करण्यात आला आहे.

महसूल विभागाच्या या कारवाईमुळे गौण खनिजाची अवैध उत्खनन व वाहतूक करणाऱ्यांमध्ये खळबळ उडाली आहे. या प्रकरणाचा पुढील तपास नंदुरबार उपनगर पोलिसांकडून सुरू आहे.