मुसळधार पावसामुळे तोरणमाळ घाटमार्गातील रस्ता खचला

कोटबांधणी गावाजवळील पुलालगतचा भराव वाहून गेल्याने रस्ता खचला आणि काही काळ दोन्ही बाजूंची वाहतूक पूर्णपणे ठप्प झाली. परिणामी, महाराष्ट्रातील प्रमुख थंड हवेचे ठिकाण असलेल्या तोरणमाळचा संपर्क काही काळासाठी तुटला.कोटबांधणीजवळील नाल्याला अचानक आलेल्या जोरदार पुरामुळे पुलाच्या एका बाजूचा भराव वाहून गेला. पाण्याचा प्रवाह एवढा वेगवान होता की रस्त्याचा मोठा भाग खचला. त्यामुळे चारचाकी वाहने तसेच मालवाहतूक करणारी वाहने घाटमार्गावर अडकून पडण्याची परिस्थिती निर्माण झाली. पाण्याचा प्रवाह सुरू असतानाच वाहून गेलेला रस्त्याचा भराव पूर्ववत करण्याचे आव्हानात्मक काम हाती घेण्यात आले. जेसीबीच्या साहाय्याने दगड-माती टाकून भराव भरण्याचे काम युद्ध पातळीवर सुरू करण्यात आले.