राष्ट्रीय क्रीडा दिनाचे औचित्य: महिला महाविद्यालयात क्रीडा विभागाचे दिमाखात उद्घाटन!

(नंदुरबार) विद्यार्थिनींच्या सुप्त क्रीडागुणांना हक्काचे व्यासपीठ मिळवून देण्यासाठी येथील महिला महाविद्यालयात क्रीडा विभागाचे दिमाखात उद्घाटन करण्यात आले. राष्ट्रीय क्रीडा दिनाचे औचित्य साधून या विशेष कार्यक्रमाचे आयोजन करण्यात आले होते. या उपक्रमामुळे महाविद्यालयातील विद्यार्थिनींमध्ये खेळाविषयी एक नवा उत्साह पाहण्यास मिळाला.

कार्यक्रमाची सुरुवात भारतीय क्रीडा क्षेत्राचे दैवत, हॉकीचे जादूगार मेजर ध्यानचंद यांच्या प्रतिमेचे पूजन करून करण्यात आली. या प्रसंगी प्रमुख पाहुणे म्हणून सेवानिवृत्त क्रीडा संचालक प्रा. डॉ. ईश्वर धामणे उपस्थित होते. तसेच स्टाफ सेक्रेटरी प्रा. डॉ. मधुकर देसले, एनएएसी (NAAC) समन्वयक प्रा. डॉ. एस. एच. जैदी आणि रासेयो (NSS) विभाग प्रमुख प्रा. पी. आर. जोशी यांनी देखील कार्यक्रमाला उपस्थित राहून विद्यार्थिनींना प्रोत्साहित केले. कार्यक्रमाच्या अध्यक्षस्थानी महाविद्यालयाचे प्राचार्य डॉ. सुनील कुवर होते.

कार्यक्रमाच्या सुरुवातीला प्रा. बी. एफ. चव्हाण यांनी आपल्या प्रास्ताविकातून क्रीडा विभागाच्या स्थापनेमागील उद्दिष्टे आणि विद्यार्थिनींच्या आयुष्यात खेळाचे असणारे महत्त्व विशद केले. कार्यक्रमाचा समारोप प्रा. राजकुमार पाटील यांनी मानलेल्या आभाराने झाला.

हा कार्यक्रम यशस्वी करण्यासाठी जिमखाना विभाग प्रमुख प्रा. डी. एल. टाकोळे यांच्यासह प्रा. रिनेश एस. पावरा, प्रा. रामेश्वर पाडवी आणि प्रा. डॉ. सुमित्रा शेप यांनी विशेष परिश्रम घेतले. क्रीडा विभागाच्या या नव्या सुरुवातीमुळे महाविद्यालयातून आगामी काळात उत्तम महिला खेळाडू घडतील, असा विश्वास यावेळी व्यक्त करण्यात आला.