महाराष्ट्र उत्कृष्ट सार्वजनिक गणेशोत्सव मंडळ स्पर्धे’चा राष्ट्रीय-आंतरराष्ट्रीय विस्तार; २५ सप्टेंबरपर्यंत अर्जाची संधी

पु. ल. देशपांडे महाराष्ट्र कला अकादमी, सांस्कृतिक कार्य विभागाच्या वतीने आयोजित या स्पर्धेसाठी राज्यभरातून ४३२ मंडळांनी अर्ज सादर केले असून, ठाणे जिल्ह्यातून सर्वाधिक ५२ अर्ज प्राप्त झाले आहेत.

अर्ज सादर करताना राष्ट्रीय व आंतरराष्ट्रीय मंडळांनी गेल्या वर्षभरातील आयोजित केलेल्या गणेशोत्सव व संबंधित सांस्कृतिक उपक्रमांची तसेच यावर्षीच्या गणेशोत्सवाची छायाचित्रे जिओटॅग फोटोंसह सादर करावयाची आहेत. स्पर्धेचे परीक्षण पारदर्शक पद्धतीने करण्यात येणार असून, मंडळांचे सामाजिक व सांस्कृतिक उपक्रम, सांस्कृतिक वारशाचे जतन, भाविकांसाठी सुविधा, महिला, विद्यार्थी व ज्येष्ठ नागरिकांसाठीचे उपक्रम, पर्यावरणपूरक मूर्ती व सजावट आदी बाबींचा विचार केला जाणार आहे.

राज्य, राष्ट्रीय व आंतरराष्ट्रीय स्तरावरील प्रथम तीन विजेत्यांना अनुक्रमे ७ लाख ५० हजार, ५ लाख व २ लाख ५० हजार रुपयांची पारितोषिके तर तालुकास्तरीय प्रथम विजेत्यास २५ हजार रुपये, जिल्हास्तरीय प्रथम तीन विजेत्यांना अनुक्रमे ५० हजार, ४० हजार व ३० हजार रुपयांची पारितोषिके देण्यात येणार आहेत.

जगभरातील गणेशभक्तांना सार्वजनिक व घरगुती गणपतीचे ऑनलाइन दर्शन घेता यावे यासाठी https://ganeshotsav.pldmka.co.in हे ‘गणेशोत्सव’ पोर्टल १४ सप्टेंबरपासून खुले होणार आहे. या राज्य महोत्सवातील सर्व उपक्रमांमध्ये गणेश मंडळांनी व नागरिकांनी उत्स्फूर्त सहभाग घ्यावा, असे आवाहन सांस्कृतिक कार्यमंत्री ॲड. आशिष शेलार यांनी केले आहे.