गणेशोत्सवात सुरक्षिततेला प्राधान्य! महावितरणचे आवाहन; अनधिकृत वीज वापर टाळा, अधिकृत जोडणी घ्या

मंडप उभारताना आणि मिरवणुकीत ‘ही’ काळजी घ्यामहावितरणने उत्सव कालावधीसाठी काही महत्त्वपूर्ण मार्गदर्शक सूचना जारी केल्या आहेत:
तारांची उंची लक्षात घ्या: बाप्पाच्या आगमन आणि विसर्जन मिरवणुकीदरम्यान रस्ते तसेच गल्लीबोळांतील विजेच्या वाहिन्यांची (तारांची) उंची लक्षात घेऊनच गणेशमूर्तीची उंची व रथाची रचना निश्चित करावी.
मंडप उभारणीत सावधानता: विजेच्या तारा किंवा खांबांजवळ मंडप उभारताना पुरेशी काळजी घ्यावी. मंडप आणि रोषणाईसाठी वीज संचाची मांडणी करताना सुरक्षेच्या नियमांचे काटेकोर पालन केले जावे.
कुशल तंत्रज्ञांची मदत घ्या: संभाव्य अपघात टाळण्यासाठी केवळ प्रमाणित आणि कुशल विजेच्या ठेकेदारांकडूनच अंतर्गत वायरिंग व वीज जोडणीचे काम करून घ्यावे.
घरी बसून ऑनलाईन अर्ज करा; तात्पुरती वीज जोडणी मिळवामंडळांची गैरसोय टाळण्यासाठी महावितरणने वीज जोडणीची प्रक्रिया अत्यंत सोपी केली आहे. गणेश मंडळांना महावितरणच्या अधिकृत मोबाईल ॲप किंवा ऑनलाईन संकेतस्थळावरून (वेबसाईट) अर्ज करून त्वरित तात्पुरती वीज जोडणी मिळवता येणार आहे. सार्वजनिक सुरक्षेला धोका निर्माण होईल अशा पद्धतीने कोणत्याही मंडळाने अनधिकृतपणे विजेचा चोरटा वापर करू नये, असा इशाराही देण्यात आला आहे.पर्यावरणपूरक आणि ऊर्जा बचतीचा संदेशकेवळ रोषणाईच नाही, तर पर्यावरणाचे रक्षण करण्यासाठीही महावितरणने मंडळांना एक पाऊल पुढे टाकण्याचे आवाहन केले आहे. ऊर्जा बचतीसाठी गणेश मंडपात एलईडी (LED) दिव्यांचा वापर करावा. शक्य असल्यास सौर ऊर्जेचा वापर करून पर्यावरणपूरक गणेशोत्सवाबाबत समाजात जनजागृती करावी, असे महावितरणने आपल्या निवेदनात म्हटले आहे.